Unioni de is Comunus de su Partiolla e de su Campidanu 'e Bàscius

Su Caminu Poderau

Su Caminu (o Adelantamentu) Poderau

Po Caminu Poderau seus narendi:

• un'adelantamentu ki satisfit s'abisonju de oi ken''e bogai sa possibilidadi a is ki ant a benni de satisfai s'abisonju intzoru puru (Brundtland, World Commission on Environment and Development, 1987);
• un'amelloramentu de sa calidadi de sa vida, kentz''e passai su tanti ki s'ecosistema podit poderai (World Conservation Union, UN Environment Programme and World Wide Fund for Nature,1991).

S'idea de caminu poderau tenit tres facis: de logu, sotziali e econòmiga. S'adelantamentu est poderau candu donniuna de custas tres facis tenit su pròpiu pesu. Is kistionis prus de importu funti tres:
1. A frimai s'arruina de su logu
2. A no impoboressi is genias benidoras (paridadi intr''e una genia e is atras)
3. A amellorai sa calidadi de sa vida e sa paridadi intr''e sa genti de oi (paridadi a intrus de sa pròpiu genia e totu)

AGENDA Bintunu

Est unu programa po su caminu poderau, ki dd'ant fatu in sa Cunferèntzia de s'Onu de Rio de Janeiro de su 1992, cun prus de 180 Stadus.

S'Agenda Bintunu lìstat, ke un'agenda e totu, totu sa cosa 'e fai po su caminu podera in su sègulu 21. Funt polìtigas, strategias e atzionis ki is Stadus ki dd'ant firmada si impìnnant a fai po aministrai mellus is scusorjus e po ndi fai gosai cun prus paridadi.

De manera crara e lestra, Agenda Bintunu si fait biri cumenti po su caminu poderau srebit a marolla unu programa fatu a posta. In prus, po dònnia kistioni ki podit 'essiri, po dd'arresorvi tòcat a pigai in cunsideru totu is facis de sa kistioni, a detzidi is apretus, is cumpromissus e is sagrifìtzius de manera crara (sempri ki nci ndi siant), a fai beni unu sistema de cuntrollus e de strùmbulus, a incrarai is tentas longas e crutzas e su tempus ki srebit.

In su capìtulu 28 de sa Setzioni 3 de Agenda Bintunu fuèddant de sa faina de s'enti de su logu. Jai ki medas kistionis nascint in su logu e totu, su traballu de is istituiduras de su logu tenit un'importu manu meda, ki no fait a ndi fai de mancu, po s'adelantamentu poderau.

AGENDA Bintunu DE SU LOGU

Agenda 21 de su Logu est un'aina ki no fait a ndi fai de mancu po s'adelantamentu poderau. Dònnia autoridadi de su logu iat a depi kistionai cun sa genti, is assòtzius, is siendas, cumprendi cali funt is strategias mellus e si fai s'Agenda 21 de su Logu intzoru. Totu custu po una calidadi de sa vida prus arta e po umperai is cusrjus de manera prus poderada, 'oghendi spedrìtzius e ponendi eficèntzia.

Is fundòrius funt:

• Sa Pratza (Forum), ki totu is partis interessadas detzidint imparis unu caminu po amellorai sa calidadi de sa vida, s'economia e su logu
• S'Arrelata po Cument'est su Logu (Rapporto sullo Stato dell'Ambiente), scruculliendi sa terra, sa sotziedadi e s'economia, est un'aina po connosci e informai, su puntu de partèntzia po pranifigai su logu de manera poderada
• Su Pranu de Atzioni est su dogumentu ki ndi bessit de su traballu de sa Pratza e incràrat is tentas, su caminu de interbentus e is atzionis pràtigas

1 | 2 | 3 | 4 | 5